TACLOBAN CITY – Nagdeklara na hin state of calamity an probinsya han Southern Leyte mahitungod han nagtitikahitaas nga kaso hin dengue ha ira lugar.
Sumala kan, Danilo Atienza, Provincial Disaster Risk Reduction Management Officer (PDRRMO) han Southern Leyte, kawsa han mao nga deklarasyon an pagkakaalarma han probinsya ha paghitaas han dengue cases kun diin umabot ini ha 200 nga kaso ha tanan han 18 nga munisipalidad ngan usa nga syudad ha Southern Leyte.
Pinaagi han mao nga deklarasyon han state of calamity in magagamit na an quick response fund han probinsya para ha pagpalit han mga ginkikinahanglan ha anti-dengue drive.
Padayon naman an pahimatngon han provincial government ngan an ginbubuhat nga mga pitad agud nga mapugngan an paghitaas pa han kaso han dengue ha bug-os nga probinsya.
Nahibaruan nga una na nga nagdeklara hin state of calamity an mga pira nga mga probinsya ngan syudad ha rehiyon.
