TACLOBAN CITY – Nakumpiskar ha gindumara nga buy-bust operation ha Brgy. 106 Sto Niño, Tacloban City, an gin aalegar nga shabu nga nagkakantidad hin sobra P400,000 kun diin nadakop gihapon iton mga suspek hine.
Ginkilala an mga suspek kanda alyas “Brad”, usa nga High Value Individual ngan Top 2 ha Watchlisted drug personality (City Level), ex-PNP member, ngan residente han Brgy. Casuntingan, MacArthur, Leyte; alyas “Son”, usa nga Street level Individual, ngan residente han Brgy. Danao MacArthur, Leyte; alyas “Jai”, usa nga Street level Individual, ngan residente han Brgy. B2 Abuyog, Leyte; ngan alyas “Malou”, usa nga Street level Individual, ngan residente han Poblacion Zone 2, Javier, Leyte.
Sumala kan PMaj. Marjorie Manuta, Information Officer han Tacloban City Police Office, nakuha ha mga suspek an maabot ha 60 gramo han gin aalegar nga shabu nga mayda estimated market value nga P408,000.
Nakuha naman kan alyas “Brad” an unom ka-sachet han gin aalegar nga shabu, usa nga P500 bill, upat nga P1000 bill nga boodle money, usa ka-unit hin color green nga hand grenade, usa ka-unit hin calibre 45 nga pusil nga may nakasulod nga usa nga magazine, unom nga bala hin caliber 45, eyeglass pouch, belt bag, firearm holster, ngan disposable lighter, samtang nakuha naman kan alyas “Son” an unom ka-sachet han gin aalegar nga shabu digital weighing scale, ngan usa nga plastic container, nakuhaan naman hi alyas “Jai” hin duha ka-sachet han gin aalegar nga shabu ngan usa nga pouch bag, ngan nakuha gihapon kan alyas “Malou” an lima ka-sachet han gin aalegar nga shabu ngan usa coin purse.
Hapagkayana in ada ha kustodiya hiton kapulisan an mga suspek kun diin papasakahan an mga ine han kaangayan nga kaso.
