TACLOBAN CITY – Nakumpiskar ha nagpapadayon nga COMELEC checkpoint ha Brgy. Bulusao Lawaan Eastern Samar an sobra P1M nga kantidad han gin aalegar nga shabu ngan granada, dida han nakalabay nga adlaw.
Gin kilala an suspek kan alyas Dino, 42-anyos an pangidaron, ngan residente han General MacArthur, Eastern Samar.
Sumala kan Lawaan Municipal Police Station Officer-in-Charge, PLt. Jonathan Rivas, gin ‘para’ an suspek dida han COMELEC checkpoint mahitungod han kawaray hine sul-ot nga helmet.
Gin aruan naman ine han iya driver’s license ngan rehistro hin motor, kun diin dida han pag-abri han u-box han motor han suspek in dayun nga nahikit-an an usa nga granada ha sulod hine nga nagresulta naman han pagka-aresto han suspek.
Ha panginano pa han mga otoridad in nakuhaan gihapon ine hin upat ka-medium sized nga plastic bag nga gin aalegar mayda sulod nga shabu.
Gin padara naman an nasabi nga plastic bag ha Regional Forensic Unit 8 kun diin nakumpirma nga shabu an sulod hine. Mayda naman ine kabug-aton nga 190.7779 ka-gramos ngan mayda estimated market value nga P1,336,336.
Samtang gindara naman ha supply officer an nakumpiska nga granada para han paghirot.
Nakatalaan naman nga pasakahan hin mga kaso nga pagtalapas ha RA 9165 (Illegal Possession of Dangerous Drugs), Comelec Resolution 11067 (Carrying or Transporting Firearms or Other Deadly Weapons Including Explosives), ngan RA 9516 (Possession of an Explosive or Incendiary Device) an nasabi nga suspek ngan nakadetine ha Lawaan Municipal Police Station.
