Umabot na ha sobra 52,000 Certificates of Registration (COR) nga mayda kaupod nga Registration Seal Badge an naipanhatag han Bureau of Internal Revenue (BIR) ha mga online seller, service provider, ngan content creator kutob dida han Oktubre 14, 2026.
Ginlunsar an Registration Seal Badge ha ilarom han Revenue Memorandum Circular (RMC) No. 38-2026 agud maproteheran an pribado nga impormasyon ngan privacy han mga nakarehistro nga negosyo ngan propesyunal ha digital platforms.
Ginbalyuan hini an anay patakaran dida han 2024 nga nagmamando nga ig-display ha publiko an bug-os nga kopya han COR o electronic COR (eCOR) ha mga website ngan social media page.
Gintagan-duon ni BIR Commissioner Charlito Martin R. Mendoza nga panuyo han badge nga himuon nga mas talwas ngan hapsay an mga online transactions samtang ginhihimo nga mas madali an pagsunod ha balaod han buwis.
An nasabi nga proyekto in kaparte han BIR DARES reform agenda para ha Digital and Data Transformation, nga ginkakalakipan gihapon han electronic registration, digital TIN identification, Taxpayer Portal, ngan an phased implementation han electronic invoicing.
Samtang, ha ilarom han RMC No. 99-2026, ginpahilawig han BIR an deadline ha pagbubutang hin badge ha mga digital page kutob Oktubre 31, 2026.
Gin aghat han buhatan an mga covered taxpayers nga dayun nga mag-secure ngan mag-post hin badge, samtang pwede gihapon ini ig-scan han mga mamaralit agud maberipika kun lehitimo an mga online business ugsa makipag-transakyon.
