TACLOBAN CITY – Nakakarawat hin bag-o nga mga pedicab an maabot 45 nga pedicab drivers ha Tacloban City pinaagi han livelihood grant han Public Employment Service Office (PESO) ngan pakikipagbubligay gihapon han Department of Labor and Employment Regional Office 8.
Sumala kan Tacloban City Cooperative Development & Livelihood Office/ PESO& CLEP Head, Ruena Mate nga ini nga panhatag hin pedicab in tikang ha Integrated Livelihood Program han DOLE nga may panuyuan nga matagan hin kadugangan nga income ha mga benepisyaryo ngan makabulig nga mapaupay iton ira kinabuhi.
Maabot naman ha P900,000 an kabug-usan nga kantidad han mga ginpanhatag nga pedicab nga tikang ha pondo han nasabi nga programa han DOLE.
Nagkamayda gihapon hin usa nga briefing an mga benepisyaryo ha mga balaud pantrapiko ngan mga enforcement measures sugad man an pangarawat han mga ini han ira Mayor’s Business Permit.
Dugang pa ni Mate, nga pumirma gihapon hin kasuratan an mga pedicab drivers maypaghisumpay ha responsable nga pag-atiman han ira nakarawat nga unit kun diin, nakabutang dinhi nga dire puydi igbaligya o ig-prenda nira an mga nakarawat nga pedicabs ngan mayda ini kaangayan nga penalidad ha mga madadakpan.
