NATIONAL – Nakaghipatik an Philippine National Police hin kabug-usan nga 3,616 nga indibidwal nga nagtalapas ha ginpatuman nga election gun ban kadungan han nakalabay nga panahon han piniliay ha nasud.
An nasabi nga datos han PNP in nahipatik tikang han Enero 12 kutob Hunyo 11 han presente nga tuig.
Nahipatik gihapon han pulisya an maabot ha 3,702 nga armas nga ira nakumpiskar ha sulod han nasabi nga panahon.
Ha usa nga pahayag, ginmalatumat han Philippine National Police nga nagin mahimyang an kabug-usan han 2025 midterm National and Local Elections yana nga tuig.
Basar naman ha datos han National Election Monitoring Action Center, nagdumara an PNP hin kabug-usan nga 998,679 election checkpoints ha bug-os nga nasud nga nagresulta ha pagkaka-aresto hin ada ha 265 nga indibidwal.
Nagresulta gihapon ine ha kabalabgi han 1,879 nga indibidwal, 556 nga indibidwal an naaresto ha gindudumara nga anti-illegal drugs operations, 229 tikang ha gun buy-busts, 686 tikang ha iba pa nga law enforcement operations ngan usa mahitungod ha internal security operation ha Bicol Region.
