Haros umabot na ha 2,025 katawo an excess deaths ha France resulta han nae-eksperyensyahan nga heatwave ha Europa tinikangan dida han katapusan nga semana han Hunyo, subay ha public health officials.
Nahibaruan nga 30 porsyento ini nga mas hitaas kumpara ha nakalabay nga semana. Sumala naman kan French Health Minister Stéphanie Rist, kapansin-pansin an paghitaas ha ihap han mga namatay, ha edad nga 45 paigbaw.
Mababaruan nga dida han Hunyo 24, nahipatik han France an pinakamapaso nga adlaw ha kasaysayan han France kun diin umabot ha haors 41°C an temperatura ha Paris samtang ginpailarom naman ha red heat aler an katunga han nasud.
Ginlalauman nga utro maabot ha 40°C an tempeatura ha sur nga parte han France, samtang nagpagawasnaman an gobyerno hin red alert status mahitungod ha hulga han forest fires.
Subay ha datos, 7,000 nga sunog na an nahipatik tikang han magtikang an katsirak, nga nag-ugbaw ha sobra-kulang 8,700 ektarya han katunaan ha nasud. Yinukot-yukot nga residente gihapon an ginbakwit mahuman an pagsarang han wildfire.
Samtang, maabot ha 1,222 an nahipatik nga excess deaths ha Belgium, 39 porsyento nga mahitaas. Haros katunga naman han mga namatay in nag-eedad hin 85 paigbaw.
Ha Netherlands naman, nahipatik han mga otoridad an ginbabana-bana 480 excess deaths dida han nakalabay nga semana, kadam-an in mga senior citizens nga ada ha edad 80 paigbaw, mahuman umabot ha haros 40°C an tempeatura ha pira nga parte han nasud.
Subay ha Copernicus Climate Change Service, an Europa an pinakamalaksi magpaso ha ngatanan han kotinente, ngan magpaso hin duha kabeses nga mas malaksi kumpara ha global average.
Mahitungod hini, mas agsub nga maeksperyensyahan an duro nga heatwave, kakulangan ha suplay han tubig ngan wildfire.
