TACLOBAN CITY – Maabot ha sobra 10 million pesos nga kantidad hin ilegal nga droga an gindistroso han Philippine Drug Enforcement Agency (PDEA) Regional Office 8 ha ira gindumara nga destruction activity ha Heavens Gateway Chapel, Maharlika Highway Pawing Palo, Leyte.
Sumala kan Rogellette Urgel, tagapagyakan han PDEA Regional Office 8, an mao nga aktibidad in ginpangunahan mismo ni PDEA 8 Director Edgar Jubay.
An mao nga mga illegal nga droga ginpailarom ha destruction amo an mga illegal drug evidences nga nakumpiskar han PDEA ha ira gindumara nga anti drug operations sugadman an mga ginturnover han mga otoridad.
Basar ha report han PDEA Regional Laboratory 8, maabot ha 641.10 grams hin gintutuuhan nga shabu nga may estimated market value nga P4.3 million, 4 kilograms hin marijuana nga may market value nga P490,000 ngan 994.2 grams hin cocaine nga may kantidad nga P5.2 million an ginpandistroso han PDEA.
An pagdistroso han mao nga mga illegal drugs in usa nga compliance nga nasusubay ha aludayday nga gintalaan ha kostudiya ngan disposisyon han mga ilegal nga droga nga nakukumpiskar han mga otoridad basar ha Sec. 21 Article II han Republic Act 9165 o an Comprehensive Dangerous Drugs Act of 2002 ngan Dangerous Drugs Board Regulation No. 1, Series of 2002.
