![](https://img.bomboradyo.com/tacloban/2019/08/68851663_624212051401353_7461333812153155584_n.jpg)
TACLOBAN CITY – Maabot ha siyam nga mga kabataan nga biktima hin Child exploitation ngan Online sex trafficking an nasalbar han mga kapulisan ha bungto han Naval, Biliran.
Ha pakighimangraw han Bombo Newsteam tikang kan Pol/Col Romeo Perigo, Hepe han Women and Children protection center for the Visayas, nga kalakip ha mga nasalbar nga mga kabataan in edad walo ka bulan, uno anyos, tres anyos, 14 anyos ngan 16 anyos.
Sumala hini nga bulan han Hunyo han makakarawat hira hin impormasyon bahin han natatabo nga online sex trafficking ha mao nga lugar.
![](https://img.bomboradyo.com/tacloban/2019/08/955A5690-77DB-42C6-B5E0-B7F54AB03590.jpeg)
Dayun nagdumara an mga ini hin imbestigasyon ngan yana la nga adlaw duha nga entrapment operation an ginkasa han mga Kapulisan ha usa nga Inn ha Naval nga kun diin alas 11 han aga han masalbar an 5 nga mga menor de edad samtang 4 pa nga indibidwal an nasalbar pag abot han Kulop.
Nadakop liwat ha mao nga entrapment operation an mag live-in partner nga alyas Anna, 19 anyos ngan Raul, pareho mga residente han Rosario, Naval, Biliran.
Sumala kan Perigo, nga ginbabaligya han mga suspek an mga maglaw-ay nga mga litrato ngan video han mga menor de edad online kabalyo hin 90 dollars o kun naabot 4,590 pesos.
An ginkakasubo pa kay anak la mismo ni Alyas Anna an duha ha mga biktima — an walo ka bulan ngan usa nga tres anyos.
Nagpapabilin naman ha Department of Social Welfare and development (DSWD) an mga kabataan samtang ada ha kustodiya han Naval Police station an mga suspek ngan naatubang ha kaangayan nga kaso.