TACLOBAN CITY – Iguin anunsyo han National Bureau of Investigation Region 8 nga ira pag aabrehan ngan pagtutukuron an Cybercrime office dinhi ha rehiyon nga matutok han mga kaso kaparte han cybercrimes.
Sumala kan NBI Regional Director, Atty. Emeterio Dongallo, Jr nga ini daw in mahitungod nga ira naoobserbaran nga nagtitikahitaas an mga kaso ngan ihap han mga nagrereklamo kaparte han cybercrime ha rehiyon.
Kaparte daw gihapon ini han modernization program han ahensya nga ha ira pagtitindog hin bag-o nga office building ngan pag ayad han ira liwat daan nga opisina ha Tacloban nga kun diin, igdudugang dinhi an Cybercrime Office nga puydi naman daupan han mga gusto magreklamo.
Natuo hi Dongallo nga magigin madali nala daw ini para han NBI nga aksyunan an mga cybercrimes cases mahitungod nga mayda naman opisina ha rehiyon nga amo ini an magkakapot han sugad nga mga kaso.
Ha pagkayana in mayda na daw pondo nga iginhain para han mga office equipment ngan mga magigin agents nga makapot han mao nga opisina.
