TACLOBAN CITY – Plano nga pagbuhaton hiton National Telecommunications Commission (NTC-8) iton pan rehistro han mga SIM card ha kada Barangay.
Sumala kan Engr. Willy Zabala, Regional Director hiton National Telecommunications Commission (NTC) Regional Office 8, dudrungan na hira nga magbubuhat hiton simcard registration yana nga semana.
Kinahanglan naman daw nga pumakada ha ira munisipyo adton mga residente han mga interior barangays para igparehistro an ira mga simcard sugad nala hiton Tolosa kun diin an magigin venue han panrehistro han simcard in amu an Tolosa Gymnasium.
Gin hangyo naman hine nga magkamay-ada hin schedule an kada barangay ha pagparehistro para dire magmahuot an lugar han panrehistro.
Kinahanglan naman nga magdara hin usa nga government-issued ID ngan an cellphone kun diin igsesend an one-time pin (OTP), kun waray naman daw government-issued ID in pwede gihapon an barangay certification ngan may picture.
Gin aaghat naman hine an mga katawhan nga magprehistro na hiton ira mga simcard samtang dire pa naabot iton deadline han panrehistro.
