INTERNATIONAL – Nasolusyonan an harani na nga pagsarado han gobyerno han Amerika mahuman nga igpasar han United States Congress an iginduduso nga budget deal.
Siyahan na nga gin-aprubahan han US House of Representatives an nasabi nga bala-udnon ha botos nga 366-34 ngan mahuman an usa ka-oras in ginlanat han US Seante an pagpasar hini ha botos nga 85-11.
Pero lapos na ini hin sobra katunga ka-oras ha deadline nga katutnga han gab-i han Sabado, Disyembre 21, 2024.
Ha kaluyo hini, iginpasa an nasabi nga bala-udon kan US President Joe Biden para pirmahan na kumo opisyal nga bala-od.
Mahitungod ha nasabi nga pitad, nasalbar an Pasko han sobra nga 800,000 nga trabahador nga harani na nga diri matagan hin sweldo kun nadayon an pagshutdown han gobyerno han Amerika.
Manunumduman nga pinaka-urhi nga nagsarado an gobyerno han US han nakalabay nga termino ni Trump dida han tuig 2019 nga nag-iha hin 35 ka-adlaw, kun diin igintutudlok ini nga pinakamaiha nga government shutdown ha bug-os nga kasaysayan han Amerika.
