ENTERTAINMENT – Ginpaangbit han “Megastar” nga hi Sharon Cuneta nga umilarum hiya dida han nakalabay ha usa nga medical procedure ha iya spine ha Singapore mahuman makaabat hin grabe nga panul-ul ha sakob han duha ka-tuig.
Ha usa nga Instagram post dida han Marso 12, ginpaangbit han beterana nga singer-actress nga an iya pag-kadto ha Singapore in mahitungod ha medical reasons. Sumala ha iya, maiha na hiya nagpailarum ha pain managemet mahitungod ha panul-ul han iya tu-o nga hawak ngan paa.
Dugang hini, nagawas ha mga eksaminasyon nga may problema gihapon an iya tu-o nga liog nga kinahanglan tambalon, sanglit kinahanglan niya nga bumalik ha Singapore ha mga masunod nga bulan.
Umaro naman hin despensa hi Sharon ha iya mga fans ngan mga kaurupdan ha trabaho mahitungod nga waray hiya makaatender ha finals han iya entertainment show, kun diin usa hiya ha mga hurado.
