TACLOBAN CITY — Patay an usa nga grade 10 student mahuman nga maligis hin duha nga sarakyan ha Brgy. Cogon, Palo, Leyte.
Guinkilala an biktima nga hi Joshville Regato, 19 anyos, residente han Guindaponan, Palo, Leyte ngan studyante han San Joaquin National High School.
Basi ha inisyal nga imbestigasyon han mga Kapulisan, nahibaruan nga nakasabit an biktima ha usa nga jeep.
Guinsundan naman an guinsakyan hini hin usa nga bus.
Sumala kan PO3 Joel Sudario, Police Investigator han Palo Police Station, nga nawarayan hin preno an sumunod nga bus rason para magderitso ini ha jeep.
Mahitungod hini, nahulog an bata ngan naligsan hasta nga nahilabog ngan naligsan pa han usa nga van.
Sumala kan PO3 Jose Sudario nga haros waray makilal-i an nawong han biktima mahitungod nga nagkalasog-lasog na ini.
Samtang, ada na ha Kustodiya han Palo PNP an duha nga driver.
Ha pagkayana, nagpapadayon pa an guinbubuhat nga imbestigasyon han mga kapulisan ha mao nga insidente.
