Gin aprubahan han Senate Energy Committee ha pangunguna ni Senador Erwin Tulfo an mga panukala nga balaod nga panuyo himuon nga mandatory an insurance coverage para ha mga line workers ngan igdeklara an syahan nga Lunes han Agosto kumo National Line Workers Appreciation Day.
Kaupod ha mga gin aprubahan nga panukala an mga Senate Bill nga iginsalawad nira Tulfo, Senador Francis Escudero, ngan Senate President Sherwin Gatchalian agud kilal-on an kontribusyon han mga line worker ha pagpapabilin han suplay han kuryente.
Gin aprubahan gihapon han komite an Senate Bill Nos. 498, 923, ngan 2448, kaupod an House Bill No. 7239, nga panuyo magpatuman hin mandatory insurance coverage ngan iba pa nga benepisyo para ha ngatanan han line worker.
Ha ilarom han mga panukala, magtutudlok hin mandatory minimum coverage paa ha life, accident, ngan disability insurance han mga line worker ha mga pribado nga distribution utility, electric cooperative, ngan transmission o grid operator ha bug-os nga nasud.
Gintagan-duon ni Tulfo nga importante matagan hin sakto nga proteksyon an mga line workers mahitungod nga kaupod ha ira trabaho an pagsaka ha mga poste ngan paghingadayad han mga linya han kuryente, labi na kun mayda bag-o, baha, linog, ngan iba pa nga kalamidad.
Kaurugan nga nagtatrabaho an mga ini hin pira kaoras, kaupod an gab-i, agud maibalik dayun an suplay han kuryente ha mga apektado nga kumunidad.
Samtang, naaprubahan na ha ikatulo nga pagbasa ha Kamara an counterpart measure agud igdeklara an National Line Workers Appreciation Day, nga ginsurat han 25 nga tinaglawas.
Ginlalauman nga ig aandam han Senate Energy Committee ha masunod nga semana an committee report ha mga panukala para ha sponsorship ngan paghingday ha plenaryo ha Senado.
