Ginsigurado ni Senator Panfilo “Ping” Lacson nga nakaandam an Senate majority bloc ha anuman nga mahugaw nga plano han gintawag niya nga “disgraced” nga anay Senate President nga hi Sen. Alan Peter Cayetano ha oras nga magkamay-ada hin special session an Senado.
Sumala kan Lacson, gin hihingadayan na han ira grupo an mga posible nga pitad ha oras nga pugngan o magsamok hi Cayetano ha pagdudumaraon nga special session ngan ginduon nga dire pwede balewarayon an kapas han igkasi senador nga maghimo hin samok mahitungod nga waray ini labot ha institusyon kundi ha kalugaringon la niya.
Dugang pa niya, trabahuhon ini ni Cayetano, kun diin ginbalikan niya an pag-padlock hadto ni Cayetano ha Kamara dida han papaiwason na ini ha pwesto kumo House Speaker.
Gintagan-duon ni Lacson nga samtang ginkikilala han haros ngatanan—labot kan Cayetano ngan pipira nga mga kaalyado hini—an pagmamangulo ni Senate President Pro Tempore Sherwin Gatchalian, iginpakita naman ni Cayetano nga mayda ini kapas nga himuon an bisan ano agud igpirit an iya kalugaringon ha pwesto.
Dugang pa, duro an pagkahilig ni Cayetano ha gahom sanglit andam ini balewarayon an reyalidad ngan maghimo hin eksena ha kaluyo han pagkilala han Kamara, Malakanyang, ngan magkadiru-dilain nga grupo ha liderato ni Gatchalian.
Kasumpay hini, ginpahimatngunan niya hi Cayetano nga maglikay ha paghimo hin samok ha oras nga madayon an special session ngan gin suhestyunan nga makiusa ha mga istoryahon ha plenaryo imbes nga mag-live ha Facebook.
Samtang, gintagan-duon gihapon ni Lacson nga kinahanglan umatender an ngtanan han senador ha special session kumo ira mandato, agud maresolba na gihapon an mga importante nga panukala ngan istoryahon ha Commission on Appointments nga naapektaran mahitungod ha dire pag-atender han paksyon ni Cayetano ha sesyon dida han Hunyo 1 kutob 3.
Ha katapusan, ginkilala ni Lacson an pagdig-on ni Senator Joel Villanueva nga umatender ha espesyal nga sesyon ngan naglalaum nga magin an iba nga senador ha han-ay han minorya in makiusa gihapon.
