METRO MANILA – Iginpanawagan na gihapon ni Senator Pia Cayetano an pagde-delatar la anay ha paghitaas han matrikula ha mga kolehiyo ngan unibersidad ha butnga ha gihapon han padayon nga paghitaas ha mga gastuson yana nga mayda krisis.
Sumala kan Cayetano, ginsusuportahan niya an apela han Commission on Higher Education (CHED) nga igdelatar la anay han ngatanan nga mga unibersidad an paghitaas ha matrikula mahitungod nga damo nga pamilya an nakukurian ha padayon nga paghitaas han presyo ha mga papliton ngan serbisyo.
Gin hangyo han senadora nga kinahanglan siguraduhon nga an edukasyon in magpapabilin nga accessible labi na ha mga panahon nga naatubang an nasud ha mga ayat.
Pag-eksplikar pa ni Cayetano, an edukasyon an susi ha paghuman han kakurian ngan pagsisiguro han intergenerational equity sanglit gin aghat niya nga magbinuligay an pribado nga sektor ngan an gobyerno nga pagaanon an pas-anon han mga istudyante.
Ginpapagiosnaman han magbabalaod an mga Higher Education Institutions (HEIs) nga magbiling hin alternatibo nga paagi ha pagbaton ha mga ayat ha ira operasyon nga dire ginpapas-an han mga istudyante ngan ira pamilyas.
