Gin aghat ni Senator Christopher “Bong” Go an mga health authorities nga pakusgon an pangandaman kontra ha mga napapanahon nga sakit ngan iba pa nga health risks ha butnga na gihapon han makusog nga El Niño phenomenon.
Gintagan-duon ni Go, Vice Chairman han Senate Committee on Health, an importansya han pagproteher ha mga bulnerable nga sektor tikang ha pabag-o bag-o nga kondisyon han panahon sugad han mga kabataan, kalagsan, PWDs, outdoor workers, ngan mga katawhan nga may-ada medikal nga kondisyon.
Gin aghat gihapon ni Go an Department of Health (DOH), LGUs, ngan mga healthcare facilities ha bug-os nga nasud nga mag-andam ha magkadiru-dilain nga hulga ha panlawas may paghisumpay ha mae-eksperyensyahan nga Super El Niño sugad han heat-related illnesses sugad han dehydration, heat exhaustion, ngan heat stroke ngan mga sakit nga posible mag paghisumpay ha kakulangan ha suplay han tubig ngan poor sanitation.
Iginduon ni Go nga dire na kinahanglan hulaton nga dumuro pa an sitwasyon ugsa gumios, ngan samtang timprano pa in kinahanglan nakaandam na an tubig, pagkaon, serbisyo-panlawas, ayuda, ngan iba pa panginahanglan han mga katawhan.
