Posible nga amyendahan han Senado an ira rules agud magpahamtang hin sirot ha mga senador nga dire nasulod ha sesyon, sumala kan Sen. JV Ejercito.
Ini in kasunod han ethics complaint kontra kan Sen. Ronald ”Bato” Dela Rosa mahitungod ha maiha hini nga pag-absent ha Senado.
Kumo Chairperson han Senate Ethics Committee, ginmalatumat ni Ejercito nga an amyenda in pwede pagdumaraon han Rules Committee, ngan kinahanglan aprubahan han plenaryo.
Sumala ha iya, waray nira kakit-e hadto nga mayda legislator nga dire masunod, sangalot kinahanglan amyendahan an nasabi nga Senate rules kumo bug-os nga body.
An reklamo kontra kan Dela Rosa in manunumduman nga ginpasaka han civil society group nga Wag Kang KuCorrupt, pero posible ma-dismiss ini dayun mahitungod nga waray pa ginpapatuman nga patakaran an Senado kasumpay han “no work, no pay.”
Tikang han Nobyembre 11 han nakalabay nga tuig, waray na umatender hi Dela Rosa ha mga sesyon mahuman nga igpahayag ni Ombudsman Boying Remulla nga mayda warrant of arrest tikang International Criminal Court (ICC) kontra ha senador.
Kumo anay hepe han pulisya ha ilarom han anay presidente Rodrigo Duterte, gintudlok hiya han ICC kumo usa ha mga “co-perpetrators” ha mga kaso han extrajudicial killings ha panahon han ‘war on drugs’ campaign han anay pangulo.
Gin klaro ni Ejercito nga an magigin desisyon ha ethics complaint in paagi la ngan dire pagprubar nga proteheran an ira igkasi magbabalaod.
