Gin kwestyon ni Senator-Judge Raffy Tulfo an dire patas nga pagpapatuman han two-minute speaking limit ha impeachment trial ni Vice President Sara Duterte dida han Miyerkules, Hulyo 22.
Nagtikang an istoryahon samtang napakiana hi Senator-Judge Robin Padilla ha House prosecution panel. Dinhi in nagpahayag hi Tulfo han iya pagkadismaya, ngan iginduon nga baga-baga hin mas natatagan hin mas halaba nga oras an pira nga senador kumpara ha iba.
Sumala kan Tulfo, dayun nga ginpapatunog an warning bell kun hiya an nagyayakan, samtang mayda mga senator-judge nga nakakagyakan hin lima ngada ha napulo kaminutos ugsa mautod an ira oras.
Dayun naman nga ginklaro ni Senate impeachment court presiding officer Francis “Chiz” Escudero nga waray “majority” o “minority” ha impeachment court mahitungod nga ngatanan han membro in nagseserbi nga senator-judges.
Igin eksplikar ni Escudero nga mayda mga higayon nga gintutugutan niya nga magpadayon an usa nga senador agud mahuman an linya han pamakiana hini, sugad han syahan nga ginhatag nga kadugangan nga oras kan Senator Panfilo ”Ping” Lacson.
Sugadman, iginduon ni Tulfo nga kinahanglan in pare-parehas an pagpapatuman han gin alutaga nga oras agud masigurado anpatas nga higayon han kada senador nga makagpakiana.
Kumo baton, ginmanduhan ni Escudero an Clerk of Court nga pahinumduman an opisyal nga nagmamangulo ha warning bell agud siguraduhon nga pare-parehas an pagpapatuman han time limit ha ngatanan han senator-judges.
Gin segundahan naman ini ni Senator-Judge Alan Peter Cayetano, nga nagpahayag nga importante an nagin obserbasyon ni Tulfo. Sugadman, naeksperyensyahan na gihapon niya nga mautdan hin oras samtang napakiana hiya.
Imbes nga mahugot nga igpatuman an duha kaminutos nga limitasyon, iginsuhestyon ni Cayetano nga hangyuon nala han presiding officer ha mga senador nga humanon an ira mga pamakiana kun kinahanglan, agud magin mas maupay an agos han pagdungog.
Samtang, gindepensahan naman ni Padilla an kahilaba han iya pamakiana. Sumala ha iya, an mga pakiana nga mababaton la hin “oo” o “hindi” an iya ginbabatak ngan an halaba nga baton han prosekusyon an nakunsumo hin dako nga oras.
