Ginkuwestiyon ni Sen. Pia Cayetano an legalidad han gindumara nga sesyon han Senado nga gin-atenderan han 12 nga senador dida han Miyerkules, Hunyo 3, duon niya nga dire insakto an nasabi nga ihap agud magbug-os hin quorum ngan magdumara hin opisyal nga sesyon.
Sumala kan Cayetano, klaro nga an probisyon han 1987 Constitution nga nagmamalatumat nga an Senado in ginbubug-os hin 24 nga miyembro ngan kinahanglan an mayorya an kabug-usa nga ihap hini agud makagdumara hin opisyal nga sesyon.
Ginmalatumat pa han senadora nga an mga opisyal han Senado in kinahanglan mahurar ha pamamaagi han mayorya nga botos han tanan nga miyembro han kapulungan.
Gibuwelta hini nga dire maikokonsidera nga mayorya an 12 nga senador ha Senado nga may 24 nga miyembro.
Siyahan hini, ginpakalasan han pira an pag-ulpot ni Sen. Francis Escudero ha Senate plenary hall kakulop, pira ka-adlaw mahuman nga waray umatender an pira nga miyembro han majority bloc ha nakalabay nga plenary session.
Samtang, nahurar naman hi Sen. Sherwin Gatchalian kumo Senate President Pro Tempore ngan gindeklara nga acting Senate President.
