Iginduon ni Senator Rodante Marcoleta nga dire plunder o panlimbong an pagkarawat niya han campaign donations.
Duon ni Marcoleta, ha nagin pahayag ha Russia Today nga iginpaangbit han iya opisina, ginpahayag han senador nga fabricated ngan sigurado nga mababasura la han korte an kaso nga plunder nga plano igpasaka kontra ha iya han Office of the Ombudsman.
Rason han senador, dire masulod ha kaso nga plunder an pagkarawat niya hin campaign donation mahitungod nga financial support ini tikang ha mga kasangkayan, samtang an plunder in pagamit han kinawat nga karikuhan.
Punto pa ni Marcoleta, dire ilegal an pagkarawat niya han campaign donations mahitungod nga igintutugot ini han Commission on Elections (COMELEC) o han election laws.
Dugang pa ni Marcoleta, nakarawat niya an campaign donations ugsa an kampanya ngan election period sanglit iginkokonsidera niya ini nga donasyon, nga daw iginbayad pa han donor tax han mga naghatag.
Natuod ni Marcoleta nga gin iinitan hiya mahitungod ha pagkaruyag nga matudlok an mga aada ha luyo han maanomaliya nga flood control projects ngan timing an pagpapasaka hin kaso ha iya agud maipapreso hiya ngan dire makabulig ha impeachment trial ni Vice President Sara Duterte.
