Gin kumpirma ni Senate President Pro Tempore Panfilo ”Ping” Lacson nga may-ada hiya nakarawat nga impormasyon nga sinurat ni anay Department of Public Works and Highways (DPWH) undersecretary Maria Catalina Cabral, kun diin, nakatalaan an daw P500 milyon nga kantidad han proyekto para kan Sen. Rodante Marcoleta.
Ha kaluyo hinj, gin klaro ni Lacson nga an pagkakamay-ada hin “allocables” in diri ilegal, pero kinahanglanon imbestigahan kun an mga proyekto in aada ha maupay nga kamutang o kun “ghost” o substandard projects.
Dugang pa han senador, iimbistigahan han Senado an mga igin sumiter nga proyekto han mga mambaralaod agud matudlok kun may-ada iregularidad ha mga ini. Sumala pa hini, diri mahitungod nga umaro hin pondo para ha proyekto in dayon nangangahulugan nga may-ada pagtalapas ha balaod.
Ginmalatumat pa ni Lacson nga damo nga mambaralaod an tikang ha pareho nga kapulungan an may-ada sugad nga “allocables,” nga sumala ha iya in matutudlok kumo modern pork barrel.
Samtang, mahugot naman nga igin diwara ni Marcoleta an alegasyon ngan gin tawag ini kumo “malicious,” sugad man ginmalatumat nga waray basaran an alegasyon ngan usa la ini nga pag guba ha iya reputasyon.
Sumala kan Marcoleta, kun an paghahatag hin endorsement ha mga proyekto in an pagbabasehan han imbestigasyon, haros tanan nga senador in angay gihapon nga imbestigaran mahitungod nga kadaras-an ini nga ginbubuhat ha Kongreso.
Igin punto pa hini nga diri puydi piriton an mga senador nga pumirma ha partial committee report ngan gin akusaram hi Lacson hin pagigin selective ha pagbibiling hin kabaratunan.
Nagtikang an tensyon ha butnga han duha nga mambaralaod mahuman balyuan hi Marcoleta kumo chairman han Senate Blue Ribbon Committee, nga yana in gin papangunahan ni Lacson, kasumpay an imbestigasyon ha daw iregularidad han flood control projects.
