Ginhangyo han lima nga senador an boluntaryo nga pagsurender ni Senator Ronald “Bato” dela Rosa ha mga otoridad.
Nakabutang ini ha Senate Resolution 395 nga ginsumite nira anay Senate President Tito Sotto III, Senators Ping Lacson, Risa Hontiveros, Bam Aquino ngan Kiko Pangilinan.
Ha resolusyon in ginpahayag an sense of the Senate kun diin ginaaghat hi Dela Rosa nga boluntaryo nga isurender an kalugaringon ha mga otoridad ngan paggamit hin mga legal nga remedyo kasumpay ha konstitusyon, ha balaud ngan ha rules.
Nakabutang ha resolusyon nga basar ha Article 6 han Konstitusyon, an Senado ngan Kamara in dire tatagan hin otorisasyon nga maghatag hin santuaryo, protective custody ngan proteksyon kontra ha pagkakadakop ha bisan hin-o nga miyembro nga naatubang ha kaso nga dire sakop han saligang batas.
Limitado la an paghahatag hin proteksyon ha mga miyembro han Kongreso nga naatubang ha sirot nga dire masobra ha unom ka-tuig nga pagkakapreso, karuyag signgon waray blanket authority o protective custody an Senado ha mga miyembro nga naatubang ha grave offenses o grabe nga pagtalapas ha balaud.
