Nagpahinumdom an Armed Forces of the Philippines (AFP) ha ngatanan han foreign national nga kinahanglan na an ira visit clearance ugsa makasulod ngan makagamit hin mga recreational activities han kampo-militar, kaupod an golf courses, kasunod han mga report han espionage may paghisumpay ha China.
Kaparte han nagpapadayon nga polisiya han AFP an clearance requirement para ha hin-o man nga magkakaruyag nga makasulod ha mga military installations. Gin aaghat an mga langyawanon nga plano gamiton an mga pasilidad han AFP nga makakuha hin sakto nga clearance hin timprano ngan sundon an ginpapatuman nga patakaran ha seguridad.
An pahinumdom han AFP in gumawas kasunod han di pala maiha nga isyu ha nasyunal nga seguridad mahuman nga madetine an tulo nga Pilipino nga gin aalegar dabi ha espionage actvities tikang ha China, subay ha National Security Council (NSC).
Sumala kan NSC Spokesperson Cornelio Valencia Jr., natudlok han konseho an pagpapadara hin mga datos ha Chinese government pinaagi han LinkedIn ngan gaming apps.
Igin eksplikar ni Valencia nga nagkamay-ada hin access an tulo nga Pilipino ha mga nasabi nga mga impormasyon ha magkadiru-dilain nga paagi.
Usa ha ira in anay assistant ha Department of National Defense, an ikaduha in anay researcher han Philippine Navy, ngan ikatulo naman in mayda koneksyon ha usa nga opisyal ha Philippine Coast Guard nga mayda access ha pira nga sensitibo nga datos.
Mahitungod hini, nagpatuman gihapon an Philippine National Police ngan iba pa nga ahensya hin mas mahugot nga counterintelligence measures, kaupod an screening ngan internal monitoring, agud malikayan an infiltration tikang ha mga langyawanon.
Subay ha AFP, supresyente na an presente nga security protocols, pero an padayon nga hulga han espionage ngan foreign interference in nagpapakita hin panginahanglan hin hitaas nga vigilance, labi na ha mga lugar kun diin mayda overlap an access han publiko ngan mga military installations.
