Binweltahan ni House Committee on Public Accounts Chair Terry Ridon an Korte Suprema ngan gin ayat ine nga aydon anay an ira kalugaringon libong ugsa sitahon an Kongreso kasumpay ha kadagmit han istoryahon han impeachment.
Ha usa nga media forum, iginpahinumdom ni Ridon ha Pinakahitaas nga Hukom an mandato han 1987 Constitution nga kinahanglan resolbahon an mga kaso ha sulod la hin 24 kabulan tikang ha pagsasalawad han mga pleadings.
Ginhimo nga pananglitan han magbabalaod an maiha na nga nakabinbin nga petisyon kasumpay ha non-contract apprehension policy, nga hasta yana in waray la gihapon pinal nga desisyon.
Sumala kan Ridon, ugsa kwestyunon han SC an lehislatura ha daw pagdagmit ha mga impeachment complaints, in kinahanglan anay siguraduhon han hukom nga nasusunod hine an kalugaringon nga deadlines ha pag-solbar han mga kaso.
Ha kaluyo hine, gin klaro han kongresista nga bisan man ginkikilala nira an judicial autonomy, nagpapabilin an kapas han Kongreso nga bantayan an Hudikatura kumo kaparte han checks and balances.
Gintagan-duon ni Ridon nga mayda klaro nga mekanismo an gobyerno para ha accountability, kaupod na hine an impeachment proceedings ngan an katungon han Kongreso nga panginanuon an paggamit han Judicial Development Fund (JDF).
