TACLOBAN CITY – Naghatag hin komento an Philippine Drug Enforcement Agency (PDEA) Regional Office 8 bahin naman han naging statement han Tacloban City Police Office (TCPO) kasumpay han pagkakadakop han suspek nga una nga gin-alegar nga empleyado han PDEA.
Una hini, nagpagawas hin statement an TCPO bahin han pagkadakop kan Michael Regala kun diin ginduduon hini nga empleyado hiya han PDEA.
Sumala han TCPO, ginbasehan nira an mao nga pahayag han suspek ngan aminado gihapon an TCPO nga nagkulang hira ha syahan nira nga nahimo ngan naipagawas nga report kun diin waray ini nira kabutangi hin word nga “allegedly” o kun ginaalegar, amu nga ini in na-misinterpret han kadam-an.
Samtang, sumala naman kan PDEA 8 Regional Director Edgar Jubay, an ira la karuyag nga maipahamtang an kamatuoran ngan okay na daw ha ira nga ginkoreksyunan na han TCPO an ira ginpagawas nga report.
Utro nga gindig-unan gihapon han PDEA nga diri konektado ha ira ahensya hi Regala mahitungod nga ini in usa la nga informant.
Ginklaro gihapon hini nga waray problema o conflict ha butnga han PDEA ngan PNP mahitungod nga ini naman in usa nga isolated case.
