SAMAR – Posible nga mahitungod ha maluya nga depensa ni Atty. Nicholas Kaufman an usa ha mga rason han pagbalyo hin legal defense han kampo ni anay Presidente Rodrigo Duterte, sumala kan Former Samar 1st District Representative Edgar Mary Sarmiento.
Dugang pa ni Sarmiento, haros ngatanan han apela ngan petisyon han kampo ni Duterte in waray kaaprubahi han International Criminal Court, durante han hi Kaufman pa an lead defense counsel.
Sumala pa ha anay magbabalaod, posible nga nangangandaman na an kampo nira Duterte para han hearing proper, kun diin gintikangan hini ha pagbabalyo hin defense counsel.
Dire naman daw kawalan hi Kaufman ha kampo nira Duterte labi na nga puros pakyas an resulta han mga petisyon, apela, ngan hangyo han ira kampo han hi Kaufman pa an ira lead counsel.
Mababaruan naman nga pormal nga nag-exprired an usa katuig nga kontrata ni Kaufman ha mga Duterte kumo lead defense counsel dida pa han Marso 31, 2026, nagpasa ini han iya resignation letter dida pala han Mayo 8, 2026.
Kasumpay hini, nagpasa na gihapon hin resignation letter an associate counsel han kampo nga hi Dov Jacobs, dida han Mayo 7, 2026 kasunod han desisyon han kampo ni Duterte nga igreorganisa an iya legal team.
Ha lain nga bahin, nakatalaan naman pagdumaraon yana nga maabot Mayo 27, 2026 an syahan nga status conference han kaso kontra kan anay Presidente Rodrigo Duterte.
