TAFT, EASTER SAMAR – Usa nga sarakyan nga jeep an nahulog ha creek ha may National Highway han Brgy. Nato, Taft, Eastern Samar.
Ginkilala an driver han jeep kan alyas Lucio, 57-anyos, usa nga retired military, ngan residente han Brgy. 4, Poblacion Can-avid, Eastern Samar, samtang an mga sakay naman hine in nag-eeda hin 4-anyos ngada ha 59-anyos, ngan mga residente han Taft ngan Oras E. Samar.
Sumala kan Palapag Municipal Police Station Chief of Police, PCapt Liborio Luces Jr., biyahe tikang ha Borongan City ngan tipakadto ha Dolores, Eastern an nasabi nga jeep.
Sumala han driver, nag-lock an manibela han jeep rason nga waray ine makabawi ngan nagduru-diretso ha may sapa an sarakyan ngan nabaliktad.
Nag-angkon naman hin mga kasamdan an mga sakay hine kun diin dida han kabaliktad han sarakyan in hinay-hinay nga nagkagawas an mga ine, ngan talwas naman an ngatanan.
Gin dara naman an mga ine ha hospital agud matambal, ngan na-release gihapon ha nasabi nga hospital ha kaparehas nga adlaw.
Waray naman magkaso an mga pasaheros ha sabot nga babatunon han driver an bayad han ira pagpatambal ngan han mga naguba nga gamit.
