Gintugutan na han Sandiganbayan an konsolidasyon han mga kaso nga ginkakaatubang ni Zaldy Co ngan iba pa nga akusado ha P289.5-million flood control project ha Oriental Mindoro.
Naaatubang hi Co ha kaso nga graft ngan malversation samtang an iba pa nga igkasi akusado in ginkasuhan hin malversation.
Ha syahan nga batch han mga ginkasuhan ngan gin isyuhan han warrant of arrest mahitungod ha haluag nga flood control corruption, in siyam pala an ada ha kostudiya han gobyerno samtang padayon pa nga ginpapamiling an iba pa.
Nag-mosyon an prosekusyon nga pag-usahon an mga kaso mahitungod nga magkakapareho an facts nga nakasulod ha kaso, kaupod an mga natudlok nga transaksyon ngan ebidensya nga ig aatubang ha pagdungog.
Ha pag-iha, gin abuyunan han anti-graft court an mosyon han prosekusyon.
Ha resolusyon nga ginpagawas han Sandiganbayan 6th Division, igin punto hine nga magigin redundant o pauru-utro, magastos, ngan mas magigin maiha para ha korte ngan ha prosekusyon ngan defense panel kun pagbubulagon pa an mga pagdungog.
