SAN MIGUEL, LEYTE – Nanhatag hin libre nga pa-suga an San Miguel, Leyte ha mga residente hine, partikular na ha Barangay Malaguinabot, San Miguel, Leyte.
Sumala kan San Miguel, Leyte Mayor Atty. Norman Sabdao, usa ha problema nga gin kakaatubang han mga residente han Pabahay program ha nasabi nga barangay in an kawaray hin suplay hin kuryente.
An mga residente han nasabi nga pabahay in mga indigent o nagkukuri nga mga molupyo han San Miguel sanglit dire gud akos han mga ine nga makagpataod hin kuryente para ha ira mga balay.
Sanglit, nakigsumpayan ine ha Leyte III Electric Cooperative agud makigbinuligay ha pagpapasuga han nasabi nga kabalayan.
An magigin bayad ha pagpataod hin suga in iglalakip ha electric bill han mga residente ngan babaydan ha sulod hin unom kabulan agud dire magin duro hin kabug-at an kabaraydan han mga residente, ngan dire matigda an pagbayad han mga ine.
Dida han nakalabay nga adlaw, Agosto 15, gin dumara an Ceremonial Energization han San Miguel Residences (Pabahay) ha Barangay Malaguinabot.
Kun diin, kun dida han mga nakalabay nga adlaw in nagsisisirom an nasabi nga lugar, yana in nagpaparawa na ine.
