TACLOBAN CITY- Guinbaton na han Alkalde han San Jorge, Samar an mga alegasyon nga guinbabatak ala kontra ha iya.
Sumala kan Mayor Jojo Grey nga diri ini kumbinsido nga guinpapaluyuhan ngan guinruruba an iya ngaran han pira nga walhon nga grupo sugad nala han Arnulfo Ortiz Command (AOC) nga diri naman daw hini kilala mahitungod nga posible an mga kakontra hini ha pulitika an nag-aamong-among han iya ngaran.
Ini in may kalabutan han guin aalegar nga guinpagawas nga surat han walhon nga grupo kun diin naging unod hini an mga nabuhat daw nga anomaliya ngan kasaypanan han mao nga alkalde.
Dugang pa han mao nga opisyal nga waray luwat ini kalabutan han mga guin aalegar nga panmatay ngan kidnap for ransom.
Man ngani, naging kampante guihapon ini mahuman nga mapamatud-an nga waray kamatuuran an guin aalegar nga shabu laboratory nga namumutang daw ha underground han panimalay hini.
Samtang, guinduon naman han mao nga opisyal nga naging mahugot an kampanya hini ala kontra ha illegal nga droga ugsa pa man nga lumingkod ha pwesto hi Presidente Rodrigo Roa Duterte.
Mababaruan nga gawas la kan Mayor Grey, nakakarawat guihapon hin pareho nga surat hi Mayor Ronald Aquino han Calbayog City ha Samar.
