-- Advertisements --

NATIONAL NEWS– Dako nga kadaugan para ha mga Pilipino an panibag-o nga pagpapahaluag han benepisyo para ha mga miyembro han Philippine Health Insurance Corporation (PhilHealth).

Ine an ginpahayag ni Speaker Ferdinand Martin G. Romualdez kasunod han nagin pitad han PhilHealth nga pahaluagon pa an benepisyo nga ighahatag hine ha ira mga miyembro nga nagkikinahanglan hin serbisyo medikal.

Madugay na nga ginduduso ni Romualdez an mga reporma ha pambansa nga sistema han panalawas agud nga matagan kabatunan an tinuod nga panginahanglan han mga pasyente ngan han iya pamilya.

Dugang pa hine an bag-o nga benepisyo han PhilHealth in baton ha madugay na nga araba nga gindaop ha iya opisina.

Usa ha mga syahan nga tututukan an bulig para ha mga pasyente nga nagda-dialysis.

Tikang ha anay 90 session ha usa katuig, ginhimo na ine nga 156 session para mabaton an 3 nga dialysis kada semana.

Ginpahitas-an gihapon an bayad han kada session nga tikang ha ₱2,600 ngada ha ₱6,350, sanglit kun susumahon nadalagan an kabug-usan nga bulig ha usa katuig hin ₱1M.

Ginpahitas-an gihapon an bulig para ha peritoneal dialysis: ₱500,000 kada tuig para ha mga adult, ngan ₱1.2 milyon para ha mga kabataan.

Sakop gihapon dinhi an kidney transplant han mga kabataan nga ada ha ₱2.1 milyon, samtanga an mga adult naman in sobra ₱1 milyon, kaupod na an check-ups kahuman hiton operasyon, mga lab test, ngan importante na medisina.