Nanawagan hi anay House Speaker ngan Leyte 1st District Representative Martin Romualdez pinaagi han iya mga abogado ha Bureau of Immigration (BI) nga magdumara hin madagmit nga imbestigasyon matapos magpagawas an ahensya hin sayop nga impormasyon kanit han gin-aalegar nga pag-gawas han kongresista ha nasud.
Ha surat nga iginpadara kan Immigration Commissioner Joel Anthony Viado, ginpahayag han kampo ni Romualdez nga waray kamatuoran an mga report nga nagtesting hiya pag-gawas ha Pilipinas para malikyan an mga kaso nga iya gin-aatubang.
Ginkontra han anay House Speaker an pagpasarang han BI hin diri beripikado ngan nakakadismaya nga impormasyon nga ha urhi gin-gamit han mga pahayagan may kalabotan ha kaso nga iginpasaka kontra ha iya ha Sandiganbayan.
Gindig-onan han kampo ni Romualdez nga an isyu may kalabotan han iya travel restrictions in nakabinbin pa ha korte ngan diri ini angay himuon nga tema han mga espekulasyon, labi na kon an impormasyon nga ginbasaran han pahayag in diri pa napamatud-an.
Sumala ha iya kampo, waray basihan an sugad nga mga alegasyon ngan ini in nakakaapekto ha iya mga katungod ngan reputasyon. Ginkikinahanglan nira an pag-usisa han BI basi matukod an kamatuoran ngan malikyan an pagpasarang hin diri eksakto nga impormasyon.
