NATIONAL–Nanawagan hi anay House Speaker ngan Leyte Rep. Martin Romualdez han dagmit nga pagpasa han House Bill No. 7227 o OFW Hospital Act nga tumong nga magpatindog ngan himuon nga balaod an Overseas Filipino Workers (OFW) Hospital kumo pagkilala ha sakripisyo han mga “modern heroes.”
Sumala kan Romualdez, dapat igkilala an papel han mga ine ha iba nga nasud pinaagi hin mas maupay nga healthcare system para ha ira.
Upod gihapon ha mga sumurat han nasabi nga balaudnon kay hi Tingog Partylist Rep. Jude Acidre.
Tumong han balaudnon nga magpatindog hin Level II Hospital ha siyudad han San Fernando, Pampanga kun diin direkta ine nga ada ha ilarom hiton Department of Migrant Workers.
Sakop han balaudnon kay an komprehensibo nga serbisyo medikal para ha mga OFWs sano nga bumiyahe tikang ha nasud, samtang ada ha kontrata, ngan pagbalik ha Pilipinas.
Kalakip didi an 24/7 telehealth services, medical examinations bago ngan kahuman han employment, ngan pagigin referral hospital han mga na-repatriate nga OFWs.
Manhahatag gihapon an ospital hin serbisyo ha mga rehistrado nga miyembro han Oversease Workers Welfare Administration (OWWA) upod an ira mga legal nga dependent ngan iba pa nga pasyente kun mayada ensakto nga kapasidad.
Sumala kan Acidre nga tumong han balaudnon nga himuon nga man-maiha ngan sistematiko an health services para ha mga OFW ngan dire la temporaryo nga tugon ha mga isyu.
An syahan nga pondo para ha pagpatuman in magtitikang ha respektibo nga ahensya ngan gobyerno ngan iglalakip ha kada tuig nga General Appropriations Act kun himuon nga balaod.
