Igin duon ni anay House Speaker ngan Leyte 1st District Representative Ferdinand Martin Romualdez nga diri niya tutugutan gamiton hiya kumo “scapegoat” han nagpapadayon nga kontrobersiya han flood control projects samtang gin aabrehan ha publiko an iya mga rekord ngan gin ayat an mga imbestigador nga tudlokon an bug-os nga han-ay han baratunon.
Gin malatumat hini nga subra na an mga kritiko ngan pagbatikos nga iya nakakarawat rason kun kay-ano nga gin pili hini magyakan bahin han mao nga isyu.
Ha usa nga importante nga pitad, gin tugutan ni Romualdez an pagpapagawas ha publiko han iya sinumpaan nga salaysay ngan mga angay nga dokumento.
Sumala pa hini, angay la nga mahibaruan han publiko an tinuod nga mga nanhihinabo.
Iginduon pa hini nga nakikigbinuligay hiya ha mga otoridad tikang pa han katikang kaupod na an pag atubang ha mga imbestigador ngan boluntaryo nga pagsusumiter han mga dokumento.
Samtang, igin diwara naman ni Romualdez an mga alegasyon nga hiya an nagplano han bisan ano nga korapsyon, ngan gin tawag ini kumo waray kamatuoran ngan hirayo ha aktuwal nga proseso han gobyerno.
Gin taganduon pa hini nga an House of Representatives in usa nga kolektibo nga institusyon kun diin, an mga desisyon in gin kakasarabutan ngan diri unilateral. Utro naman hini nga igin duon nga maatubang hiya ha mga igin babatak ha iya ha tama ngan legal nga proseso.
Mababaruan nga una na nga waray tugututi nga makalakat ha nasud hi Romualdez han ombudsman agud umilarom hin medical check-up ha Singapore.
Sumala kan Ombudsman Jesus Crispin Remulla iya gin indorso an reklamo ha Anti-Money Laundering Council (AMLC) agud i-freeze an mga assets han mambaralaod.
Ginmalatumat pa ni Remulla nga ginhuhulat nala han ombudsman an paghaon hin freeze order han AMLC kontra kan Romualdez.
