Maduon nga ginpanhimuwa ni Tingog Party-list Rep. Jude Acidre an mga akusasyon nga nagsusumpay kan anay House Speaker ngan Leyte Representative Martin Romualdez ha anuman nga anomaliya mahuman nga klaruhon han Independent Commission for Infrastructure (ICI) nga waray hira nakit-an nga basaranan agud igduon an magbabalaod.
Sumala kan Acidre, mismo an referral nga ginpirmahan ni retired Supreme Court Justice Andres Reyes an nagyayakan nga waray anuman nga “finding or conclusion of guilt” kontra kan Romualdez, kabaligtaran ha iginpapasarang nga notisya ni Navotas Rep. Toby Tiangco.
“The ICI referral itself, signed by retired Supreme Court Justice Andres Reyes, explicitly states: ‘This referral is issued without any finding or conclusion of guilt or liability on the part of Former Speaker Ferdinand Martin G. Romualdez. That is not interpretation. That is the Commission’s own language,” sumala kan Acidre.
Gin bweltahan gihapon ni Acidre hi Tiangco ha pagpapasarang hin sayop nga impormasyon nga ginamit an mga ayuda sugads han AICS, AKAP, ngan TUPAD agud “suhulan” an mga magbabalaod nga pumirma ha impeachment complaint kontra kan Vice President Sara Duterte.
Duon ni Acidre, seryoso nga ebidensya ngan dire “chismis” an kinahanglan ha sugad nga mga akusasyon, kadungan han pag-ayat kan Tiangco nga ngaranan an mga ginpapahayag hini nga nasuhulan ngan magsalawad hin reklamo ha ilarom han sinumpaan nga pahayag.
Igin duon pa han magbabalaod nga an pagpirma ha impeachment in basar ha mga dokumento ngan testimonya, ngan dire mahitungod ha anuman nga patapod hin proyekto o pondo.
Pahimatngon ni Acidre, an pagpapasarang hin disinformation in panuyo nga rubaon la an integridad han Kamara, ngan naghangyo ini nga ig undang na an paghimo hin mga istorya nga waray madig-on nga ebidensya.
