Baga-baga hin balik bad boy utro hi Senador Robin Padilla mahuman igkasa an iya advance screening han pelikula nga “Bad Boy 3” ha usa nga mall ha Cubao, Quezon City ha Hwebes han gab-i, pira kaoras la mahuman makiapi ha kontrobersyal nga pagdungog han Senate Blue Ribbon Committee nga pinangunahan han kampo ni Senate President Alan Peter Cayetano.
Kaupod ni Padilla ha nasabi nga pagdungog hira Senadora Pia Cayetano, Senador Rodante Marcoleta, ngan Senadora Imee Marcos, kun diin ginhingadayan an mga alegasyon kasumpay han maanomaliya nga flood control projects.
Kahuman han mga panhitabo ha Senado, dumiretso hi Padilla ha screening han Bad Boy 3, an pinakabag-o nga installment han pelikula nga naghatag ha iya hin agnay nga “Bad Boy of Philippine Movies” dida han dekada ‘90.
Ha panayam han media, gin amin ni Padilla nga mas malipayon hiya ha showbiz industry kumpara ha politika.
Subay ha senador, mas mabug-at an responsibilidad ha politika mahitungod nga dara hini an mga problema han nasud, samtang an showbiz in nakakaghatag hin kalipay ngan kaliawan ha mga tawo.
Iginpaangbit gihapon ni Padilla nga posible niya igpamana ha iya umangkon nga hi Daniel Padilla an titulo nga “Bad Boy,” ngan posible daw makapadis hini hi Kaila Estrada ha mga masunod nga proyekto.
