TACLOBAN CITY – Mahugot nga guintitipahan han grupo nga Samahan han Gudti nga Parag-uma (SAGUPA) an pag-apruba ha Rice Tarrification Bill.
Guinpanindugan han tagmangulo han SAGUPA nga hi Jun Berino nga diri naabuyon an mga parag-uma ha Rehiyon 8 nga maipatuman an mao nga balaudnon mahitungod nga dako an epekto hini ha mga lokal nga mga parag- uma.
Guinkakahadlukan liwat hini nga maipatuman an Rice Tarrification Bill mahitungod nga nangangaruyag-signgon la ini nga waray na quota hin kadamo han bugas an ig-iimport o papaliton han nasud tikang ha langyaw nga labnasan nga magreresulta liwat ha pagkalugi o kawaray kita han mga lokal nga parag-uma.
Guinmalatumat pa ni Berino nga diri Rice Tarrification an guinkikinahanglan han mga parag-uma, kundi an matinud-anon nga bulig han gobyerno sugad nala han libre nga binhi, fertilizer, patubig ngan sugad man an tinuod nga reporma ha tuna nga maiha na nga guinhihingyap han mga parag-uma.
