TACLOBAN CITY – Umabot na ha sobra 1,000 nga mga rice retailers ha bug-os nga Sinirangan Bisayas nga naapektaran han ginpalusad nga Executive Order No. 39 o an “Mandated Price Ceilings on Rice”, an nakakarawat na hin cash aid nga tag-P15,000.
Sumala kan Atty. Jonalyndie Chua, Regional Information Officer han Department of Social Welfare Development Regional Office Vlll, aada na ha 94.3% nga rice retailers na iton mga natagan han cash assistance tikang ha ira buhatan; karuyag sidngon nga ha sulod han 1,349 nga mga rice retailers ha rehiyon nga na-identify han Department of Trade and Industry, aada ha 1,278 na an nakakarawat han mao nga cash aid.
Dugang pa ni Chua nga mayda pa nabibilin nga 71 nga balance ha ira buhatan nga kinahanglan igpan-destribwer ha mga rice retailers ha rehiyon. Lima dinhe an na-identify han DTI nga nag-waive o kun waray na kumarawat han ira cash aid, samtang mayda pa 64 nga mga indibidwal ha listahan an waray pa makakarawat. Igbabalik manggud an nabibilin nga nga cash aid ha pondo kun waray may kumarawat hine pagkatapos hiton deadline.
Kun manunumduman, ginpagawas ni Presidente Ferdinand Marcos Jr, an Executive Order No. 39 o kun pagbubutang hin price cap ha mga produkto han bugas dida han nakalabay nga bulan, agud masolusyonan an paghitaas han presyo hine.
