NATIONAL NEWS: Target han Department of Agriculture (DA) nga iglunsar an Rice for All program buwas, Biyernes nga adlaw, kun diin an initial target price range in aada ha P45/kg ngada ha P48/kg an pinaghalo nga imported ngan local well-milled rice.
Igin-pahayag ni DA Assistant Secretary Arnel de Mesa nga posible ine igpatuman kadungan an P29 program expansion o an pagbaligya han daan nga good-quality rice ha mga vulnerable sector.
Sakop hine an mga miyembro han Pantawid Pamilyang Pilipino Program (4Ps), senior citizens, solo parents, ngan persons with disabilities (PWDs).
An Rice for All program in iglulunsar ha mga lugar nga may Kadiwa sites sugad han Cavite, Laguna, Batangas ngan iba pa.
Samtang, nauna na nga igin-pahayag han DA nga target hine nga pahalawigon an P29 ngan Rice for All programs ha Visayas ngan Mindanao ha bulan hiton Agosto.
