Opisyal na nga nanumpa hi Cavite 4th District Rep. Kiko Barzaga kumo bag-o nga membro han PDP-Laban hadton Abril 29, 2026, subay ha bulag nga social media poss han partido ngan han kongresista.
Hi Barzaga in anay membro han National Unity Party (NUP). Subay ha PDP-Laban, nagin membro ini mahuman makompleto an Basic Membership Seminar han partido.
An iya pagbalhin hin partido in nahitabo kadungan han ginkakaatubang niya nga mga isyu ha Kamara de Representantes.
Sumala kan House Deputy Speaker Janette Garin, posible nga maatubang hi Barzaga ha expulsion mahitungod ha pauru-utro nga pagpapakita hin dire maupay nga pamatasan ngan pakyas nga buhaton an iya trabaho kumo usa nga magbabalaod.
Presente nga mayda pira nga reklamo kontra ha iya nga nakabinbin ha House ethics panel.
Manunumduman nga nasuspendi hi Barzaga hin 60 kaadlaw dida han Disyembre han nakalabay nga tuig, waray sweldo ngan benepisyo, mahitungod ha disorderly behavior kasumpay han dire akma nga social media posts.
Dida han Pebrero naman, ginpahamtangan hiya hin kadugangan nga 60 kaadlaw nga suspensyon han Kamara mahitungod ha “utter contempt for institutional standards.”
Ha kaluyo hini, iginduon ni Barzaga nga an mga sirot kontra ha iya in nagseserbi nga distraction la tikang ha mas dako nga isyu, partikular na an anomaliya ha flood control projects.
“This is still pushing the issue away from the flood control mess… pati na rin ang rampant corruption sa gobyerno,” sumala kan Barzaga.
Dugang pa hini, waray niya ginbabasulan ha iya mga nagin aksyon ngan natuod hiya nga kinahanglan gihapon imbestigasyon an iba pa nga magbabalaod kasumpay han isyu.
