NATIONAL–Ginaalegar nga kinahanglan la gihapon magpadayon an mga diplomatic engagement ha parte han Department of foreign Affairs (DFA) han Pilipinas ngan China, ha kaluyo han nagtitikaduro nga batonay ha parte han Philippine officials ngan han Chinese Embassy ha Manila kasumpay ha isyu han West Philippine Sea.
Ha pakikighimangraw han Bombo Radyo kan Mamayang Liberal Partylist Rep. Leila De Lima, ginmalatumat han mambaralaod nga dire dapat maaapektuhan an obligasyon han DFA nga igduso an foreign policy han presente nga administrasyon ha kabutnga han word war ha parte han Chinese embassy ngan mga Philippine official.
Ginpahayag hine ga obligasyon han ahensya nga magbuhat hin dayalogo pinaagi han diplomatic channels kun naruruyag ine, agud nga maresolba an ano man nga kontrobersiya.
Sugad paman, siring hine nga dapat gihapon manindigon an DFA kontra ha panbabastos ngan pagbatikos ha ginbuhat han embahada kontra ha mga opisyales han nasud.
Nanawagan gihapon hi De Lima ha DFA nga magbuhat ine hin mas makusog ngan mas mabug-at nga pitad kontra ha China.
Ginrekomenda hine nga anay nga nagserbe kumo Secretary of Justice, an posibilidad han pagpapatawag ha Chinese Ambassador to the Philippines agud nga igpaklaro ha ginbubuhat han iya oisina nga pagbatikos ha mga opisyal han nasud.
Ginmalatumat nga ginbuhat na ine han Chinese government ha Philippine Ambassador to China, ngan pwede gihapon ine buhaton han DFA, ha diplomatiko nga pinaagi.
