NATIONAL NEWS– Ginpasakahan hiton Quezon City Police District (QCPD) hin reklamo nga inciting to sedition an usa nga pulis nga nag-viral online matungod ha iya partisan remarks nga kanit ha pag-aresto kan anay Pangulong Rodrigo Duterte.
Subay hiton mga otoridad, gintalapas ni Patrolman Francis Steve Tallion Fontillas an Article 142 ng Revised Penal Code in relation to the Cybercrime Prevention Act of 2012.
Mababaruan, ha syahan nga video post ni Fontillas, iya ginkwestyon an pagbabawal han ira nga mga pulis nga magpost, mag-share ngan magkomento kasumpay ha nagin pag-aresto ha anay Pangulo.
Ginbanatan gihapon hine an mga higtaas nga opisyal han Philippine National Police (PNP) partikular na hi General Nicolas Torre III ngan Pangulong Ferdinand Marcos Jr.
Ha lain naman nga post, ginkwestyon ni Patrolman Fontillas an reklamo nga ginhaon kontra ha iya ngan gindidig-unan hine nga iya la ginpapagawas an iya paninidugan nga prinsipyo.
Ginklaro gihapon niya an akusasyon nga nag-AWOL ine pinaagi han pag-post ha kopya han iya application para ha 10 ka-adlaw na leave tinikangan Marso 6-9, nga ginsumiter ngan ginpirmahan han ira chief administrator.
Nagpahinumdom naman an QCPD ha mga personnel nga kinahanglan igpabilin an apolitical ngan non-partisan ha tanan nga higayon ngan kinahanglan likayan nga mag-post han mga dire awtorisado ngan biased contents ha social media ngan iba pa nga communication platforms.
Nagpatapod naman an PNP nga ira igdadayon an kaso ni Fontillas ngan papagbatunon ine ngan mayda due process ngan commitment para ha pagsisirbii nga mayda integridad ngan waray ginpapaboran.
