TACLOBAN CITY – Nagpapabilin nga waray pa kumpirado nga kaso hin Monkeypox (Mpox) virus an Sinirangan Bisayas, ha luyo han nagpapabilin nga estado han rehiyon in ginpahimatngun ni Department of Health Regional Office 8 Information Officer Designate Princess Debbie Garcia, nga magin maikmat ngan magka-ada hin hilarom nga hibaro han sakto nga impormasyon kabahin han sakit nga Mpox.
An Mpox in usa nga sakit nga nakakatapon dara hiton Monkeypox virus nga may-ada sintomas nga parehas hiton chicken pox.
Usa ha mga durot ha lawas han mpox in an pagkakamay-ada hin mga pantal ngan butlig nga nag iiha hin 2 ngada ha 4 ka semana nga kun diin, puydi ma eksperyensyahan han usa nga indibidwal an pagkakamay-ada hin hiranat, maulul it ulo, lawas, bungkog ngan nagkakamay-ada hin lisay.
Nakukuha an nasabi nga sakit pinaagi hin pagkakamay-ada hin direct intimate contact ha usa liwat nga indibidwal o an simple nga pagkakadikit han panit hin tawo nga may-ada mpox sugadman an pakikipag hilawas, in puydi gihapon ini makatapon.
Dugang pa ni Garcia, nga puydi gihapon makag durot hin sakit nga mpox kun an usa nga indibidwal in magkamay-ada hin contact, masabod o magamit an mga tela, lamesa, lingkuran, doorknob nga nagamit o nakaptan han tawo nga may ada sakit nga mpox mahitungod nga kun makaptan ini nga mga butang han tawo nga may-ada mpox, in hataas an tyansa nga puydi makuha an nasabi ga sakit.
Gin malatumat naman hini nga puydi makalikay ha sakit nga mpox pinaagi han pagpapahiara nga mag hugas hin kamot gamit an sabon ngan malimpyo nga tubig, pag gamit hin hand sanitizer, pag dara hin alcohol, pag sul-ot hin mga higlaba nga isurulot sugad man hiton mga long sleeves ngan saruwal o jogging pants agud maiwasan an skin-to-skin contact.
Pahinumdom ni Garcia ha publiko nga kun mahihimo in likayan la anay an pag bisita o pagkadto ha mga crowded nga mga lugar.
