NATIONAL – Utro nga humitaas an ihap han mga kaso han Human Immunodeficiency Virus (HIV) ha Quezon City, nga nakaghipatik hin 421 nga bag-o nga kaso tikang han Enero kutob Mayo han presente nga tuig, kun diin humitaas ine hn 7.7% kumpara ha kaparehas nga panahon dida han 2024.
Subay ha pahayag han lokal nga pangobyernhan, an mga bag-o nga kaso in nagtikang ha ‘Young Key Population’ o mga kabataan nga nage-edad 15-24, kun diin 35% o 149 han mga bag-o nga kaso an kaupod hine, ngan 40% ha mga ine in mga istudyante.
Mahitungod hine, ginpahayag ni Quezon City Mayor Joy Belmonte nga padayon an suporta han lokal nga pangobyernuhan ha mga pasyente, kaupod an paghahatag hin kinahanglan nga medisina ha mga social hygiene clinics han syudad.
Tikang han Enero kutob Mayo han 2025, 21,000 katawo an nagdumara hin HIV testing nga mas hitaas hin 16.7% kumpara dida han 2024.
Kumo baton ha padayon nga pagdamo han mga kaso, magbubutang an nasabi nga syudad hin mga clinics nga naghahatag hin libre nga serbisyo sugad han HIV testing, Pre-Exposure Prophylaxis (PrEP), Post-Exposure Prophylaxis (PEP), Antiretroviral Therapy (ART), ngan iba pa nga serbisyo nga may kalabutan ha sexual health.
