ODD NEWS- May kasabihan nga kun para ha imo iton usa nga tawo, bumaya man ine in sigurado nga mabalik ine para ha imo.
Pero ha nasod England mga kabombo, dire tawo an bumalik ha usa nga 63-anyos nga lalaki kundi an iya pustiso nga nawaray 11-katuig na nakalabay.
Duro nga ginkapausa ni Paul Bishop han umabot ha iya panimalay an usa nga parcel tikang pa ha gobyerno han Espanya.
Mababaruan nga an sulod hine in an iya pustiso nga maiha na nga nawawara.
Pag-istorya ni Bishop, 11 katuig na an nakakalabay han umatinder hiya hin birthday party han iya sangkay ha Benidorn, Spain.
Matungod ha duro nga kahubugan, waray sabot hi Bishop nga nahilakip ha iya pagsusuka ha usa nga basurahan an iya pustiso.
Natuman naman nga nag “bar hopping” hira han iya mga kasangkayan, sanglit nga waray hira maka-pansin nga nawawara na an iya pustiso.
Ginprobaran pa hine nga balikon an iya pustiso ha basurahan pero tambak na an mga basura ngan imposible na nga mabilngan pa ine.
Mababaruan nga nagpahimo nala hiya hin bag-o nga pustiso pagbalik niya ha England, ngan mahuman an hilaba nga panahon in naipadara ngan ginbalik ha iya han Spanish authorities an iya pustiso.
Madagmit naman nga na-trace han Spanish government nga gintatag-iyahan an mao nga pustiso ni Bishop pinaagi han iya DNA.
