TACLOBAN CITY – Waray bumuto an pusil nga gintutok ha biktima ha shooting incident nga nahitabo ha Brgy. Naulayan, Matag-ob, Leyte.
Sumala kan PMaj. Arthuro Salvacion Jr., Acting Chief of Police han Matag-ob Municipal Police Station, waray bumuto an pusil han suspek nga gintutok ha biktima mahuman nga gubaton hine an biktima haiya kalugaringon nga tindahan.
Ginkilala naman an biktima kan Ambrosio Ybanez, 54 anyos an pangidaron, livestock vendor ngan residente han Brgy. Naulayan, Matag-ob Leyte.
Samtang, ginkilala naman an suspek kan Jonathan Limpiado, 33 anyos an pangidaron, fish vendor ngan residente han nasabi nga barangay.
Subay han inisyal nga imbestigasyon han kapulisan, nagawas nga mayada personal nga delito an biktima ngan suspek kun diin gin kadto daw mismo han suspek an biktima haiya tindahan para pusilon pero waray bumuto an pusil sanglit nakatago an biktima ha luyo han pader han iya tindahan.
Gintutukan naman ine utro han suspek pero nakaptan han biktima an pusil kun diin gin agaw ine utro han suspek ngan dayun naman nga dumalagan pag-iskapo.
Nakumpiskar han mga otoridad an usa nga basiyo han bala ngan ginpapailarom pa ine hin ballistic examination para mabarauan kun anu nga klase nga pusil an gingamit.
Padayon naman ginhihimo nga imbestigasyon ngan hot pursuit operation han mga kapulisan kun diin umabot na hira ha Capoocan ngan Kanangga agud la nga madakop an suspek, pero pakyas an mga ine nga madakop an nasabi nga suspetsado.
