ENTERTAINMENT – Gin-abswelto han Manila Regional Trial Court hi Pura Luka Vega o hi Amadeus Fernando Pagente ha tinuod nga kinabuhi may kalabutan han kaso nga ginpasaka kontra ha iya tungod han iya viral nga drag performance nga “Ama Namin” samtang nakasul-ot han garb ni Kristo.
Base ha desisyon han Korte dida han Hunyo 10, an Branch 184 han Manila RTC nga ginpangunahan ni Judge Czarina Samonte-Villanueva nagsiring nga waray mapamatud-i han prosekusyon an pagkasalaan ni Luka “nga waray gud pagruhaduha.” Tungod hini, gin-abswelto hiya ha pagtalapas han Article 201 han Revised Penal Code and Cybercrime Prevention Act of 2012 (RA 10175).
Kadungan hini, nagmando gihapon an korte nga magpagawas hin P72,000 nga piyansa para han temporaryo nga kagawasan ni Luka.
Waray maiwasan han drag performer an iya pagpasalamat ha iya social media para han desisyon han korte, ngan gintagan hin duon nga “usa na la an nahibilin nga kaso.”
Bisan kun abswelto na, ginpahinumdom la gihapon han korte hi Luka nga mag-ikmat ha iya mga pasundayag, ilabi na nga dako an reach han social media.
