DOLORES, EASTERN SAMAR – Temporaryo nga gintanggal ha pwesto an usa nga pulis mahuman nga maggawas han iya service firearm ha atubangan han cashier ha usa nga kaunan ha Dolores, Eastern Samar.
Ginkilala an pulis nga usa nga Police Corporal, residente han Oras, Eastern Samar, ngan naka-assign ha Can-Avid Municipal Police Station.
Sumala kan Eastern Samar Police Provincial Office Provincial Director, PCol. Ernesto Macasil, nahitabo an insidente dida han Marso 14 han gab-i kun diin sumulod ini nga pulis kaupod an iba pa ha usa nga kaunan ha Dolores, Eastern Samar. Nahireport naman ha Dolores Municipal Police Station an insidente banda alas-11:30 han gab-i han kaparehas nga adlaw.
Dugang pa ni Macasil, gintanggal na an pulis ha pwesto ngan nagtikang na gihapon an imbestigasyon kakulop, Marso 15. Ginsigurado naman hini nga mag-aatubang ha kaso nga administratibo para ha pagtalapas han polisiya han kapulisan labi na an pagdadara ngan pagpapakita hin armas ha mga pampubliko nga lugar hin dire nakauniporme ngan nakaduty.
Subay han inisyal nga imbestigasyon, dida han magbabayad na ini han ira kinaon ha restaurant in nagkulang an ibarayad han pulis kun diin naghangyo daw ini nga reresolbahon niya an problema rason nga ginpakita hini an iya service firearm kumo paggarantiya nga tinuod hiya nga pulis.
Sumala kan Macasil, unta in gin kaistorya nala han pulis an cashier o tag-iya han kaunan hin maupay agud maresolba hin hapsay an problema, lugod in nagpakita hiya han iya armas.
Makikit-an naman ha kuha han CCTV footage tikang ha kaunan nga gin pakita han pulis an iya dara nga pusil pero waray naman hini gintutok ha cashier.
Samtang, basar han ginpagawas nga press release han Police Regional Offie 8, ginmalatumat hini nga ada ha ‘restrictive costudy’ an pulis ngan ginbawian ini hin service firearm, sugadman in re-assign ini ha Provincial Administrative and Resource Management Unit.
